لوګر ولایت کې د تخنیکي هیئت لخوا د ۳ زره جریبه ځمکې بررسي
د لوګر ولایت د غصب د مخنیوي کمېسیون تخنیکي هیئت ددغه هیئت له ناستې جوړولو څخه وروسته پل علم کې د وزیر کارېز دښتې ته ولاړ او ددغې دښتې کادستري نقشې یې بررسي کړې.
یاد هیئت دغې سیمه کې ۸ قطعې کادستري نقشه کې ۳ زره جریبه شامله ځمکه تر بررسۍ لاندې ونیوله.
ځینو اشخاصو دغو قطعو کې د مالکیت ادعا درلوده او ادعا کوي چې شخصي ځمکې هم دغو قطعو کې شاملې دي. ددغو اشخاصو سندونه به ډیر ژر له کمېسیون سره شریک کړل شي.
په همدې حال کې، د میدان وردک ولایت د تخنیکي هیئت ناسته هم ددغه هیئت د رییس او غړو په حضور سره جوړه شوه او پکې د امارتي ځمکو د غصب د مخنیوي او د غصب شوو ځمکو د استرداد په اړه او کمېسیون ته د ناستو د راپور وړاندې کولو په اړه بحث او د نظر تبادله وشوه.
دغه راز یاده ناسته کې، کوټه عشرو سیمه کې د غصب مخنیوي برخه کې د هیئت د لاسته راوړنو په اړه بحث وشو او دغه راز پریکړه وشوه چې هیئت سید آباد ولسوالۍ اړوند تړیو سیمه کې د مدعی بها ځمکې د تشخیص او تثبیت په منظور حضور پیدا کړي. دغې ناسته کې د راپور جوړولو پر څرنګوالي او کمېسیون سره د هیئت د حاضرۍ شریکولو په اړه لازم تصمیم ونیول شو.
پر دې سربېره، د پنجشیر ولایت تخنیکي هیئت د غصب شوو سیمو د اسکیچ، مساحت او حدودو تعیین له پاره ددغه ولایت شتل ولسوالۍ ته ولاړ او له سیمه ییزو او امنیتي مسوولینو سره له کتنې او هغمږۍ څخه وروسته خپل کار پیل کړ. یاد هیئت د پنجشیر لوی سړک او سیند غاړو ته څېرمه ټول دوکانونه، هوټلونه او ودانې شوې سیمې اسکیچ او د هغو مساحت او حدود یې تعیین کړل.
د کنړ ولایت د ځمکې د غصب د مخنیوی تخنیکي هیئت هم د یاد ولایت مرکز کې له نو آباد کلي څخه لیدنه وکړه او د شخصي او امارتي املاکو د تفکیک کار یې پیل کړ او د هغو تر منځ د جلا والي حد يې نښاني کړ ترڅو شخصي املاک له امارتي املاکو څخه تفکیک شي.
