د پکتیا ولایت د عدليې رییس د دغه ولایت د ټولنو له مسوولینو سره وکتل
د پکتیا ولایت د عدليې رییس مولوي محمد رییس محمدي د ربیع الثاني میاشت په ۱۱ نېټه د یکشنبې په ورځ دغه ولایت کې د موجودو اتحادیو، بنسټونو او د ټولونو له مسوولینو سره وکتل او خبرې یې وکړې.
دغه کتنه د عدليې ریاست په مقر کې ترسره شوه او په هغې کې د عدليې رییس د هغو شمېر ټولنو، بنسټونو او اتحادیو د قانوني اجرااتو او فعالیتونو په اړه معلومات وړاندې کړل چې د عدليې ریاست له لوري د هغو له پاره جواز صادر شوی.
هغه وویل چې اتحادیې، بنسټونه او ټولنې اوس مهال یوازې کولای شي په حرفه اي، تخصصي او صنفي برخو کې فعالیت وکړي او د عدليې وزارت اتحادیو او بنسټونو ته یوازې په دغو دریو برخو کې جواز صادروي. هغه زیاته کړه چې په نورو برخو کې د جواز صادرول تر ثاني امر پورې ځنډول شوي دي.
په دغې ناسته کې د بنسټونو او اتحادیو په استازیتوب، د پوهنتون مېنې د جمعیت استازي، د احمد ابا ولسوالۍ د مڼو د بڼونو د اتحادیې رییس او د فري فایټ فدراسیون استازي خبرې وکړې او خپل ستونزې يې د عدليې له رییس سره شریکې کړې.
د عدليې رییس د اتحادیو او بنسټونو مسوولینو ته ډاډ ورکړ چې د خپل وس پورې به د هغوی ستونزو ته رسیدګي وکړي.
