د بلخ د عدليې رییس لیدنه د دغه ولایت د استیناف محکمې له رییس سره
د بلخ ولایت د عدليې رییس مولوي امرالله مصلح د ربیع الثاني میاشت په ۳ نېټه د سه شنبې په ورځ د دغه ولایت د استیناف محکمې له رییس مولوي محمد یوسف ابوالوفا سره په لیدنه کې د دواړو ادارو ترمنځ د حقوقي چارو د لا ډېرې همغږۍ د تامین په اړه ټینګار وکړ.
دغه لیدنه د بلخ ولایت د عدلیې ریاست په مقر کې ترسره شوه او د عدليې رییس د استیناف محکمې رییس ته د ښه راغلاست ویلو ترڅنګ د دغه ریاست د فعالیتونو په اړه خبرې وکړې. هغه د عدليې ریاست او استیناف محکمې ترمنځ همغږي او همکاري د حقوقي پریکړو او د روڼتیا په برخه کې مهم وبلل او ټینګار يې وکړ چې دغه د مراجعینو ستونزو ته د رسیدګۍ او د دواړو ریاستونو ترمنځ د ګډو موضوعاتو له پاره یو مهم ګام دی.
د بلخ عدليې رییس د دغه ریاست د مراجعینو حقوقي ستونزو د رسیدګۍ، د اسلامي امارت د حکمونو تطبیق، عدالت او بشپړ شفافیت ته د پاملرنې یادونه وکړه او د استیناف محکمې رییس ته یې د دغه ریاست د هر اړخیزې همکارۍ ډاډ ورکړ.
په همدغه حال کې د بلخ ولایت د استیناف محکمې رییس دغه کتنه د حقوقو او د حکمونو او فرمانونو د تطبیق په برخه کې یو اغیزمن ګام وباله او د دواړو ادارو ترمنځ یې د همغږۍ او همکارۍ د لا پیاوړتیا له پاره مهم وباله.
