کندز ولایت کې ۱۹۰۰ جریبه ځمکه امارتي تثبیت شوه
د کندز ولایت د ځمکې د غصب د مخنیوي تخنیکي هیئت ددغه ولایت د علي آباد ولسوالۍ د ځینو سیمو د ځمکو سندونه تر بررسۍ لاندې ونیول او یادو سیمو کې امارتي ځمکې تثبیت کړې.
دغه هیئت، د کندز ولایت د چیپ آمر لطیف، غجک سای او د علي آباد ولسوالۍ سړک نه پورته حاجي حسین قرلق کلیو کې له ۱۹۰۰ جریبو څخه د زیاتو ځمکو سندونه تر بررسۍ لاندې ونیول.
یاد هیئت، د بررسۍ لاندې ځمکو له جملې څخه نږدې ۵۲۶ جریبه ځمکه د چیپ آمر لطیف سیمه کې، له ۳۰۰ جریبو څخه زیاته په غجک سای سیمه کې او ۱۰۷۴ جریبه ځمکه د علي آباد ولسوالۍ سړک نه پورته د حاجي حسین قرلق کلي کې امارتي، تثبیت کړه.
دغه راز هیئت له ولسوال، امنیه قوماندان او د کلیو له مشرانو سره وکتل او د ځمکې د غصب د مخنیوي او اړونده مقررې په اړه معلومات وړاندې کړل. یاد هیئت سیمې له نږدې ولیدله او پر امارتي ځمکو جوړ شوي دیوالونه يې ویجاړ کړل.
په همدې حال کې، د دایکندي ولایت د تخنیکي هیئت ناسته د هیئت د رییس او غړو په حضور سره جوړه شوه او د زنبور خان کلي د معلمینو د ښارګوټي د راپور جوړولو او کمېسیون ته يې د استولو په اړه پریکړه وشوه.
په دغې ناسته کې، د چو، ګرګ کشته او سل بستره روغتون تر شا د ځمکو په اړه د لا زیاتو څیړنو په اړه او د موظف هيئت لخوا د ښاروالۍ پلان کې د سیمو پر مشخصولو پریکړه وشوه.
دغه راز یاده ناسته کې، رمکک کلي کې درې قطعې ځمکه تر بررسۍ لاندې ونیول شوه او د تخنیکي هیئت په راتلونکو غونډو کې د امنیه قوماندانۍ د استازي پر حضور ټینګار وشو.
پر دې سربېره، د بغلان ولایت د ځمکې د غصب د مخنیوي تخنیکي هیئت د پلخمري ښار له ځینو سیمو څخه لیدنه وکړه او امارتي ځمکې يې تثبیت کړي.
یاد هیئت د پلخمري په جنوب کې شمرق سیمې ته ولاړ او هغه ځمکې چې کلونه مخکې د زورواکو لخوا غصب شوې او تاسیسات يې پرې جوړ کړي دي، وپېژندلې. یاد هیئت غاصبینو ته استعلام ورکړ او له هغوی څخه يې سندونه وغوښتل.
