کابل ولایت کې ۸ زره او ۳۴۰ جریبه ځمکه امارتي تثبیت شوه
د کابل ولایت د ځمکې د غصب د مخنیوي کمېسیون تخنیکي هیئت د دوو تېرو ورځو په ترڅ کې ددغه ولایت په چهار آسیاب او شکردرې ولسوالیو کې د غصب شوو ځمکو د تصفیې چارې پیل کړې او د شکردرې ولسوالۍ د انتفات په سیمه کې ۴ زره جریبه ځمکه، په کوبچه کلي کې ۴۰ جریب ځمکه او ۳۰۰ جریبه نوره ځمکه یې د الغوي په کلي کې تصفیه او تشخیص کړه.
په قریه دانشمند کې هم ځینې سیمې بررسي شوې، حدود او مساحت یې مشخص شوو او له هغو اشخاصو څخه چې د مالکیت ادعا یې درلودله، سندونه وغوښتل شول.
چهار آسیاب ولسوالۍ کې د نامونیاز کلي او په دشت سقاوې کې هم غصب شوې ځمکې ولیدل شوې، د هغو حدود او د جي پي اس ټکې د مساحت معلومولو په منظور واخیستل شوو.
په همدې حال کې، د بلخ ولایت د ځمکې د غصب د مخنیوي د تخنیکي هیئت ناسته هم جوړه شوه او په دغه ولایت کې له ځینو سیمو څخه لیدنه وشوه.
په دغې ناسته کې، د ناصر خسرو بلخي د هستوګنې پروژې په اړه چې ۱۰ زره او ۸۴۰ جریبه ځمکه او د کرنې د مامورینو پروژه چې ۱۰۰۰ جریبه ځمکه پکې شامله ده بحث وشو او د راپور په بشپړولو او د راتلونکو اجراآتو په غرض کمېسیون ته یې د استولو په اړه ټینګار وشو.
دغه راز په یاده ناسته کې، د مزار شریف په شمال کې د ۹ زره جریبه ځمکې په اړه د یو شخص عریضه بررسي شوه او هیئت له یادې ساحې څخه لیدنه وکړه. د ۵ ښارګوټو مسوولین جلب شوو او د هغوی سندونو بررسي او په دغې برخه کې لازم اجراآت ترسره شول.
پر دې سربېره، د پروان ولایت تخنیکي هیئت هم ددغه ولایت د بګرام ولسوالۍ په خم کلان سیمه کې خپلو بررسیو ته دوام ورکړ او مشخصه یې کړه چې د څینزیو او ناصرو کلیوکې نږدې ۸۴۹.۳۵ جریبه ځمکه غصب شوې او پر هغې کورونه، سړې خونې او مزرعې جوړې شوي دي.
یاد هیئت د غاصبینو نوملړ هم د سیمه ییزو خلکو په مرسته جوړ کړ او د هغو راپور به ډیر ژر کمېسیون ته ړاندې کړي.
