پکتیا ولایت کې ۳۵ جریبه ځمکه له غصب څخه آزاده شوه
د پکتیا ولایت د ځمکې د غصب د مخنیوي تخنیکي هیئت ددغه ولایت روحاني بابا ولسوالۍ ته ولاړ او د ځمکې د غصب د مخ نیوي برخه کې عملي اقدامات ترسره کړل.
یاد هیئت د روحاني بابا ولسوالۍ له سیمه ییزو مسوولینو او قومي مشرانو سره وکتل او هغوی ته یې د عالیقدر امیرالمومنین حفظه الله د فرمان او اړوندې مقررې په اړه معلومات وړاندې کړل.
دغه راز یاد هیئت له ځايي مشرانو څخه د غصب شویو ځمکو د تثبیت او پولو تعیین او د هغو د غاصبینو د مشخص کولو په برخه کې د همکارۍ غوښتونکی شو. هغوی ټینګار وکړ چې دغې ساحه کې عملي کار به ډیر ژر پيل شي او هیچا ته اجازه نه ورکوي چې امارتي ځمکې غصب کړي.
یاد هیئت ۳۵ جریبه امارتي ځمکه د هغې له متصرفینو څخه آزاده کړه او کېنول شوي نیالګي يې پکې راټول کړل. دغه راز هیئت ځايي اوسیدونکو ته معلوماتي استعلامونه وویش ترڅو هغه ځواب کړي.
په همدې حال کې، د کندوز ولایت د تخنیکي هیئت ناسته د یاد هيئت د رئیس او غړو په حضور سره جوړه شوه او د قلعه ذال ولسوالۍ د تثبیت شوو ساحو د بررسۍ، سکیچ او کروکي او بررسۍ لاندې ساحو کې د کار درولو په اړه بحث او خبرې وکړې.
په دغې ناسته کې د مرکزي کمېسیون له لارښوونې سره سم په چهارطاق، د حاجي اسلم ګذر، د قاضي حسین ګذر او د رستاق آباد ګذر ساحو کې د جوړو شویو کورونو پر سکیچ او کروکي چې ۱۸۳ جریبه امارتي ځمکه پکې شامله ده، پریکړه وشوه.
