پکتیا ولایت کې د یو مدافع وکیل د نیول کېدلو دلیل «شخصي دعوا» ده
د پکتیا ولایت عدليې رئیس مولوی محمد رئیس محمدي او له هغه سره مل پلاوي د مدافع وکیلانو له یو تن عبدالولي تدبیر او د هغه د ورور د نیول کېدلو د موضوع او علت د صحت او سقم معلومولو په منظور، له هغوی سره د دغه ولایت په محبس کې وکتل.
ځینو رسنیو د دغو وکیلانو نیول کېدلو ته داسۍ انعکاس ورکړی وو چې ګواکي د افغانستان اسلامي امارت د مدافع وکیلانو له کار او فعالیت سره مخالف دی او مدافع وکیلانو ته د کار اجازه نه ورکوي او په همدې دلیل عبدالولي تدبیر او د هغه ورور یې نیولې دي.
له دې امله چې په ولایتونو کې د مدافع وکیلانو کنټرول او د هغوی ستونزو ته رسیدګي د ولایتونو د عدليې رئیسانو له صلاحیتونو څخه دي نو ځکه د پکتیا ولایت د عدليې رئیس او له هغه سره مل پلاوي د شوال میاشت په ۲۱ نېټه د پنجشنبې په ورځ د دغه ولایت محبس ته ولاړ ترڅو د یادو شویو مدافع وکیلانو د نیول کېدلو علت وپوښتي.
یادو شویو مدافع وکیلانو د خپل نیول کېدلو علت د یو شمېر افرادو شکایت وباله، ویې ویل چې له یو شمېر افرادو سره شخصي دعوا لري او د هغوی د عريضې په اساس نیول شوي دي.
د عدليې رئیس یاد شوي مدافع وکیل ته ډاډ ورکړ چې د افغانستان د اسلامي امارت د نافذ شویو قوانینو په پام کې نیول سره له قانوني لاره له هغوی سره همکاري کوي او د هغوی ستونزو ته به رسیدګي وکړي.
د یادولو وړ ده چې د افغانستان اسلامي امارت په هیڅ ډول د مدافع وکیلانو له کار او فعالیت سره مخالف نه دی بلکه هغوی له پاره د قانوني فعالیت جوازونه ویشي او د هغوی ستونزو ته رسیدګي کوي او ښکاره بیلګه یې څو مودې وړاندې د عدليې وزارت لخوا د رسنیو په حضورکې د سلګونو مدافع وکیلانو له پاره د جواز ویشل دي.
