په کنړ ولایت کې د عریضه لیکنې د فعالیت د جواز له یو شمېر غوښتونکو څخه ازموینه واخیستل شوه
د کنړ ولایت عدلیې رياست د صفرالمظفر د مياشتې په ۸ مه نېټه د شنبې په ورځ، په یاد ولایت کې د عریضه لیکنې د فعالیت د جواز له یو شمېر غوښتونکو څخه د ارزونې او د ازموینې اخیستلو برنامه جوړه کړه.
د یادې برنامې په پرانیسته کې د عدلیې رياست مسؤلينو د ازموينې د شفاف والي څخه ډاډ ورکړ او ټينګار یې وکړ چې عریضه ليکونکي دې د جواز له اخیستو وروسته خپل فعاليتونه د اصولو او قوانينو په رڼا کې ترسره کړي، عریضه دې په روښانه توګه وليکي او په دې برخه کې له بشپړې امانت دارۍ او صداقت څخه کار واخلي.
په یاده ازموينه کې چې د عدليې رياست مسؤولينو، د ولایت د مقام او استيناف محمکې استازو ترې څارنه وکړه، د فعالیت جواز ۱۲ تنو غوښتونکو په کې برخه اخيستې وه.
د عدلیې وزارت په مرکز او عدلیې ریاستونه په ولایتونو کې وخت په وخت د عریضه لیکنې د جواز له غوښتونکو څخه ازموينه اخلي، ترڅو وړ او با استعداد کسانو ته په قانوني او اصولي ډول جواز وویشل شي او هم د خلکو په کارونو کې آسانتياوې رامنځته شي.
