په کندز ولایت کې څه دپاسه ۴۰ جریبه ځمکه استرداد شوه
د کندز ولایت د ځمکو د غصب د مخنیوي د تخنیکي هیئت ناسته د ذوالقعدې د میاشتې په ۲۲ نېټه د یکشنبې په ورځ د هیئت د رئیس او غړو په حضور سره جوړه شوه او د علي آباد ولسوالۍ د امام رمضاني ساحې په ۲۹ جریبه امارتي ځمکې د څېړنو بشپړولو په اړه چې د غیر شرعي متصرفینو له خوا د استوګنې کورونه پرې جوړ شوي، بحث وشو او پریکړه وشوه چې د دغې موضوع راپور مرکز ته واستول شي.
یاد شوي هیئت د امام صاحب ولسوالۍ په اسکي ساحه کې ۴۰ جریبه او ۱۸ بسوې ځمکه چې وړاندې تثبیت او سکیچ شوې وه، استرداد کړه او د هغې د اجارې ورکولو په اړه یې لازمې لارښوونې وشوې.
د چهاردرې ولسوالۍ په احمدزیو کې د ۷۰ جریبه امارتي ځمکې دوسیې هم بررسي شوه او د هغو په برخه کې د څېړنو په اړه لازمې لارښوونې صادر شوې.
په دغې ناسته کې د چهاردرې ولسوالۍ او د سمنګان د خلم ولسوالۍ ترمنځ د مرزې ساحې د څړځای شخړه بررسي شوه او دغې برخه کې لازم تصمیمونه ونیول شو. په همدې توګه د شیرخان بندر چهل کپې ساحې د ۱۲۰ جریبه ځمکې قضیه چې وړاندې امارتي تثبیت او استرداد شوي او د هغې د اجارې ورکولو بهیر د پړاونو تېرولو په حال کې دی بررسي شوه.
دوه یمه ورځ د کرنې ریاست کارکوونکي د کندز ولایت د تخنیکي هیئت په لارښوونې، د ګلتپې ولسوالۍ په توبره کش ساحه کې د امارتي ځمکو له غصب څخه مخنیوی وکړ. یادوکارکوونکو ساحه له غصب څخه خلاصه کړه او په کې جوړ شوي دیوالونه یې ویجاړ کړل.
