په کندز ولایت کې د ۸ زره جریبه امارتي ځمکې تثبیت او تشخیص
د کندز ولایت د ځمکو له غصب څخه د مخنیوي تخنیکي هيئت ناسته د ربیع الثاني د مياشتې په ۲۵ مه نېټه د دوشنبې په ورځ، د ياد هيئت د رئيس او غړو په ګډون ترسره شوه.
د تخنيکي هيئت په دې ناسته کې د ياد ولایت په عسقلان ساحه کې د اته زره (۸۰۰۰) جریبه ځمکې موضوع په اړه بحث وشو او په ترڅ کې یې یاده ځمکه امارتي تثبیت او تشخیص شوه. هيئت پرېکړه وکړه چې د یادې ځمکې دوسیه دې، د وروستۍ پرېکړې په موخه مرکزي کمېسيون ته واستول شي.
همدرانګه، تخنيکي هيئت په یاده ناسته کې د کندز ولایت په مردان شاه اليچن ساحه کې د اوه دېرش (۳۷) جریبه ځمکې دوسیه بررسي او تر بحث لاندې ونيوله او پرېکړه یې وکړه چې یاده دوسیه دې د یوه مؤظف پلاوي له لوري بشپړه او د وروستۍ پرېکړې په موخه مرکزي کمېسيون ته واستول شي.
