په پکتیا کې درې موټرپلورنځۍ د «پنجشنبې بازار» جوړولو په دلیل وتړل شوې
د پکتیا ولایت د عدلیې ریاست نظارتي پلاوي د رجب المرجب د میاشتې په ۱۳ نېټه د پنجشنبې په ورځ په ګردیز ښار کې د موټرپلورنځیو د فعالیت په نظارت سره، درې موټرپلورنځۍ د «پنجشنبې بازار» جوړولو په دلیل چې په ناقانونه توګه په کې وسایط پیرل کېدل او پلور کېدل، وتړلې او مهرلاک کړې.
یاد پلاوي د پکتیا په مرکز، ګردیز ښار کې نوې موټرپلورنځۍ نظارت او بررسي کړې او مشخصه شوه چې په یاد بازار کې درېو موټرپلورنځیو ناقانونه فعالیت ترسره کړی دی. یادې موټرپلورنځۍ مهرلاک شوې او متصدیانو ته یې لازمې توصیې وشوې.
د هېواد په کچه د اسلامي امارت د عدلیې وزارت د لارښوونې په اساس مخکې د «جمعه بازار»، «پنجشنبې بازار» اود نورو موارد په نوم د وسایطو د پېر او پلور ناقانونه بازارونه منع شوي دي ترڅو د جعل کارۍ او د ناقانونه فعالیت مخنیوی وشي.
