په پکتیا ولایت کې د ۵ دارالوکالو له فعالیتونو څخه نظارت ترسره شو
د پکتیا ولایت د عدلیې ریاست نظارتي پلاوي د ذوالقعدې د میاشتې په ۷مه نېټه د دوشنبې په ورځ، د دغه ولایت په مرکز، ګردېز ښار کې له ۵ دارالوکالو څخه نظارت ترسره کړ او د هغو فعالیتونه یې بررسي کړل.
نظارتي پلاوي د یادو دارالوکالو دفترونه، د فعاليت جوازونه، د ثبت کتابونه، لوحې او نور سندونه بررسي کړل.
د دې نظارت په ترڅ کې، د دارالوکاله یو شمېر نيمګړتياوې مشخصې شوې او د هغو متصديانو ته د یادو ستونزو د لرې کولو او د کاري چارو ښه پرمخ وړلو په موخه لازمې توصيې وشوې.
همدارنګه، د نظارت پر مهال مدافع وکیلانو هم خپلې شته ستونزې له پلاوي سره شریکې کړې، چې د حل ډاډ ورته ورکړل شو.
د پکتیا ولایت د عدلیې رياست په دوامداره توګه په یاد ولایت کې له اړوندو برخو څخه نظارت ترسره کوي ترڅو د غير قانوني فعالیتونو مخنيوی وشي.
