په پکتیا ولایت کې د عریضه لیکنې د فعالیت د جواز له یو شمېر غوښتونکو څخه ازموینه واخیستل شوه
د پکتیا ولایت عدلیې رياست، د شوال د مياشتې په ۲۹ مه نېټه د یکشنبې په ورځ، په یاد ولایت کې د عریضه لیکنې د فعالیت د جواز له یو شمېر غوښتونکو څخه د ارزونې او د ازموینې اخیستلو برنامه جوړه کړه.
په دې برنامه کې د عدلیې رئيس مولوي فاتح الله فاتح، ګډون والو ته د ازموينې د پروسې له روڼتيا څخه ډاډ ورکړ او زياته یې کړه چې عریضه لیکوونکي دې خپل فعاليتونه د قانون او اصولو په رڼا کې ترسره کړي، له خلکو سره نيک چلند وکړي او په کارونو کې له اخلاص او امانت دارۍ څخه ګټه پورته کړي.
په یاده ازموينه کې چې د عدليې رياست او د نورو سيمه ایزو ادارو استازو ترې څارنه وکړه، د عریضه لیکنې د فعالیت د جواز ۱۸ تنو غوښتونکو په کې برخه اخيستې وه.
د عدلیې وزارت په مرکز او عدلیې ریاستونه په ولایتونو کې وخت په وخت د عریضه لیکنې د جواز له غوښتونکو څخه ازموينه اخلي، ترڅو وړ او با استعداد کسانو ته په قانوني او اصولي ډول جواز وویشل شي او هم د خلکو په کارونو کې آسانتياوې رامنځته شي.
