په ننګرهار کې د معاملاتو لارښوونو د دفترونو ۲۶ تنو متصدیانو ته زده کړه ییزه برنامه جوړه شوه
د ننګرهار عدلیې ریاست د یاد ولایت د مرکز، جلال آباد ښار د پنځمې ناحیه اړوند د معاملاتو لارښوونو ۲۶ تنو متصدیانو لپاره یوه ورځنۍ زده کړه ییزه برنامه جوړه کړه.
په دې برنامه کې چې د صفرالمظفر د میاشتې په ۲۰ نېټه د شنبې په ورځ د عدلیې ریاست په مقر کې جوړه شوه د یاد ریاست د انسجام آمریت مسؤولینو په کې ګډونوالو ته د معاملاتو لارښوونې د اصولو، د معاملاتو لارښوونو د مسؤولینو وجایبو او په سمه توګه له سټو او د ثبت له کتاب څخه د ګټه اخیستنې په اړه لازمې لارښوونې وکړې او دغه راز د معاملاتو لارښوونې اړوند د قانون مواد یې هغوی لپاره تشریح کړ.
د ننګرهار د مستوفیت ادارې مسؤولینو هم د دغې برنامې په یوې برخه کې د مالیاتو د تادیې په اړه خبرې وکړې او له ګډونوالو سره یې لازم معلومات شریک کړل.
دغه راز په دې برنامه کې د معاملاتو لارښوونې مسؤولینو او متصدیانو خپلې پوښتنې او ستونزې مطرح کړې او د عدلیې ریاست مسؤولینو د هغوی پوښتنو ته ځواب وړاندې کړ او د ستونوزو لرې کولو په برخه کې یې هغوی ته ډاډ ورکړ.
د ننګرهار عدلیې ریاست په پام کې لري چې د یاد ولایت په کچه د ټولو معاملاتو لارښوونې د دفترونو مسؤولینو ته دغه ډول زده کړه ییزې برنامې جوړې کړي ترڅو معاملات په شفاف او قانوني توګه ترسره شي او دغه راز مالیات په سمه توګه تادیه شي.
