په ننګرهار ولایت کې ۸ د معاملاتو لارښوونې دفترونه د غیر قانوني فعاليت له امله وتړل شول
د ننګرهار ولایت د عدليې ریاست د انسجام آمریت په رهبرۍ ګډ نظارتي پلاوي، د جمادیالثانی د مياشتې په ۱۵ نېټه د شنبې په ورځ د دغه ولایت مرکز جلالآباد ښار اړوند په نهمه ناحیه کې د معاملاتو لارښوونې له ۱۱ دفترونو څخه نظارت ترسره کړ.
مؤظف نظارتي پلاوي د دغه نظارت په ترڅ کې د یادو دفترونو د فعالیت جوازونه، د ثبت کتابونه، د پېر او پلور قانونيتوب، رسمي سټې او یو شمېر نور اړين اسناد بررسي کړل چې په ترڅ کې یې ۸ دفترونه د غيرقانوني فعاليت له امله وتړل شول.
همدارنګه د دغه نظارت په ترڅ کې نظارتي پلاوي د پاتې نورو دفترونو په فعاليتونو کې یو شمېر نيمګړتياوې او ستونزې مشخصې کړې او د یادو ستونزو د لرې کولو او د کاري چارو ښه پرمخ وړلو په موخه یې د هغو متصدیانو ته لازمې توصیې وکړې.
د یادونې ده چې د ننګرهار عدلیې رياست په دوامداره توګه له اړوندو برخو څخه نظارت ترسره کوي تر څو د غیر قانوني فعالیتونو مخه ونیول شي.
