په ننګرهار ولایت کې د عریضه لیکنې د فعالیت د جواز له یو شمېر غوښتونکو څخه ازموینه واخیستل شوه
د ننګرهار ولایت عدلیې رياست، د ذوالقعدې د مياشتې په ۲۶ مه نېټه د سه شنبې په ورځ، په یاد ولایت کې د عریضه لیکنې د فعالیت د جواز له یو شمېر غوښتونکو څخه د ارزونې او د ازموینې اخیستو برنامه جوړه کړه.
د ازموينې په یاده برنامه کې د ننګرهار ولایت عدلیې رئیس ګډونوالو ته د ازموینې د پروسې له شفافوالي څخه ډاډ ورکړ او زياته یې کړه چې د فعالیت جواز به وړ کسانو ته ورکړل شي او له هغوی څخه یې وغوښتل تر څو په خپلو کارونو کې امانت داري، صداقت او تقوا اختیار کړي.
په یاده ازموينه کې چې د عدليې رياست مسؤولینو ترې څارنه وکړه، د فعالیت جواز غوښتونکو ۲۹ تنو په کې برخه اخيستې وه.
د عدلیې وزارت په هېواد کې وخت په وخت د عریضه لیکنې د جواز له غوښتونکو څخه ازموينه اخلي، ترڅو وړ او با استعداد کسانو ته په قانوني او اصولي ډول جواز وویشل شي او هم د خلکو په کارونو کې آسانتياوې رامنځته شي.
