په میدان وردک ولایت کې د تېرو دوو میاشتو په اوږدو کې د څه باندې ۸۱۰۰ جریبه امارتي ځمکې تثبیت
د میدان وردک ولایت د ځمکو د غصب د مخنیوي تخنیکي هیئت د یاد ولایت له والي، قاري بختیار معاذ سره یوه ناسته جوړه کړه او د یاد هیئت دوه میاشتنی کاري راپور یې نوموړي ته وړاندې کړ.
یاده ناسته د شعبان د میاشتې په ۱۰ نېټه د چهارشنبې په ورځ د میدان وردک ولایت په مقام کې جوړه شوه. د یاد ولایت والي ته د تخنیکي هیئت د وړاندې شوي راپور له مخې، په میدان وردک کې د تېرو دوو میاشتو په اوږدو کې ۸۱۰۵ جریبه امارتي ځمکه تثبیت شوې ده.
دغه راز د یاد راپور په اساس د ۲۶ زرو ۹۶۵ جریبو نورو ځمکو دوسیې د وروستۍ پریکړې په موخه مرکزي کمېسیون ته استول شوي دي.
په دې ناسته کې د یو لړ نورو موضوعاتو په اړه هم بحث وشو او په دې برخه کې لازم تصمیم ونیول شو. دغه راز هیئت خپلې کاري ستونزي او خنډونو د میدان وردک له والي سره شریک کړل.
د میدان وردک ولایت والي د تخنیکي هیئت د فعالیتونو په قدردانۍ له یاد تخنیکي هیئت سره د هر اړخیزې همکارۍ ژمنه وکړه.
