په مکه معظمه کې «د اسلامي مذهبونو ترمنځ د پُل جوړولو» په نړیوال کنفرانس کې د عدلیې وزیر ګډون
د اسلامي امارت د عدلیې وزیر، محترم شیخ الحدیث مولوي عبدالحکیم شرعي د روژې د میاشتې په ۶مه نېټه د پنجشنبې په ورځ د اسلامي مذهبونو ترمنځ د پُل جوړولو په نړیوال کنفرانس کې چې د سعودي عربستان د مکې معظمې په ښار کې ترسره شو، ګډون او وینا وکړه.
د اسلامي امارت د عدلیې وزیر په خپله وینا کې د سعودي عربستان له دولت او د اسلامي هېوادونو د پیوستون له سازمان څخه د دغه ډول کنفرانس جوړولو له امله د قدردانۍ ترڅنګ، وویل چې په افغانستان کې رسمي مذهب حنفي فقه ده خو امامان، علما او د ټولو مذهبونو پیروان هم د قدر او درناوي وړ دي.
هغه د ټولو اسلامي مذهبونو د عالمانو او امامانو ترمنځ تفاهم د ګډو موخو لپاره، په ځانګړي ډول په هغو لویو مسایلو کې چې له شرعي پلوه یووالي او پیوستون ته اړتیا لري، مهم او حیاتي وباله.
د اسلامي امارت د عدلیې وزیر د خپلو خبرو په بله برخه کې وویل چې اسلامي امارت له ټولو هېوادونو په ځانګړي ډول له اسلامي هېوادونو سره د اړیکو د پیاوړتیا غوښتونکی دی. هغه څرګنده کړه چې د سعودي عربستان دولت کولی شي په دې برخه کې هر اړخیزه همکاري او مثبت رول ولري.
همداراز هغه د فلسطین د مسألې په تړاو خبرې وکړې او په اړه یې د امیرالمؤمنین حفظهالله تعالی پیغام بیان کړ. هغه زیاته کړه چې د اسلامي امارت د زعیم نظر دا دی چې موږ د فلسطین پر وړاندې خپل مسؤولیت نه دی ادا کړی، او د فلسطین قضیه، د ټول اسلامي امت قضیه ده.
دغه کنفرانس د اسلامي هېوادونو د پیوستون سازمان له لوري جوړ شوی وو چې دوه ورځو لپاره یې دوام وکړ او د اسلامي هېوادونو مقاماتو او د بېلابېلو هېوادونو اسلامي عالمانو په کې ګډون کړی وو.
