په جوزجان ولایت کې له یو شمېر دارالوکالو څخه نظارت ترسره شو
د جوزجان ولایت د دارالوکالو د نظارت ګډ پلاوي د دغه ولایت په مرکز، شبرغان ښار کې له یو شمېر دارالوکالو څخه نظارت ترسره کړ او د هغو فعاليتونه یې بررسي کړل.
دغه نظارتي پلاوي چې په ترکیب کې یې د جوزجان ولایت د مقام، د عدلیې رياست او استیناف محکمې استازي ګډون لري، د یو شمېر دارالوکالو د فعاليت له جواز لیکونو، د ثبت کتابونو، مالياتي مکلفیتونو، مُهرونو، لوحو او یو شمېر نور اړين اسنادو څخه نظارت ترسره کړ.
د یاد نظارت په ترڅ کې د ځینو دارالوکالو نیمګړتیاوې مشخصې شوې او پلاوي د نیمګړتیاوو د لرې کولو او د کاري چارو د لا ښه تنظیم په موخه د هغو متصدیانو ته لازمې توصیې وړاندې کړې.
د جوزجان ولایت د دارالوکالو د نظارت پلاوی په پام کې لري چې په چارو کې د آسانتیاو، خلکو ته د ښه خدمت رسولو او د غیر قانوني فعالیت د مخنیوي په موخه د جوزجان ولایت په کچه له ټولو دارالوکالو څخه نظارت ترسره کړي.
