په جوزجان ولایت کې د تېرې میاشتې په اوږدو کې د ۲۵۰۰ جریبه ځمکې بررسي
د جوزجان ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام د میاشتې په ۱۴ نېټه د دوشنبې په ورځ د جوزجان ولایت د والي د مرستیال په مشرۍ او د تخنیکي هیئت د رئیس او غړو په حضور سره د یاد ولایت د والي د مرستیال په کاري دفتر کې جوړه شوه.
په دغې ناسته کې، تخنیکي هیئت د ۱۴۴۴ هجري قمري کال د ذوالحجې میاشتې په اوږدو کې د خپل فعالیتونو او لاسته راوړنو یو میاشتنی راپور د یاد ولایت د والي مرستیال ته وړاندې کړ. د دغې میاشتې له وړاندې شوي راپور سره سم، د شبرغان د مرکز په سه شنبې کلي کې ۱۷۰۰ جریبه ځمکه او د جوزجان ولایت په خواجه دو کوه ولسوالۍ کې ۸۰۰ جریبه نوره ځمکه بررسي شوې ده.
د دغه راپور پر بنسټ د پل خراسان سیند د حریم ساحه له پاپلین څخه تر خواجه دو کوه ولسوالۍ، د شبرغان د مرکز په آلتي خواجه او صوفي قلعه ساحو کې د تور سیند حریم، په خانقاه ولسوالۍ کې علیلي وطني کلی، د شبرغان ښار په مرکز کې جګدلک کلی او د شبرغان ښار د مرکز د بابه علي کلي اړوند د خروټي اول ناقلینو د ځمکه والۍ ساحه د دغه هیئت بررسۍ لاندې ده.
د جوزجان ولایت د والي مرستیال د یاد ولایت د تخنیکي هیئت له کړنو او فعالیتونو څخه قدرداني وکړه او په دغه ولایت کې د امارتي ځمکو د غصب مخنیوي په برخه کې له تخنیکي هیئت سره د هر اړخیزې همکارۍ ژمنه وکړه.
