په تېره یوه میاشت کې کابو ۹۰ زره کسانو ته حقوقي پوهاوی ورکړل شوی
د عدلیې وزارت د حقوقي مرستو رياست په مرکز او ولایتي آمریتونو يې په ولایتونو کې د روان کال د جمادیالأولی د مياشتې په ترڅ کې د ۲۲۴ برنامو په جوړولو سره ۸۹ زره او ۸۵۷ تنو هېوادوالو ته حقوقي پوهاوی وړاندې کړی دی.
یادې برنامې د مرکز په شمول د هېواد په ۲۸ ولایتونو کې ترسره شوې، چې د هغو له ډلې څخه ۱۸ زره او ۸۲۸ تنه په کابل، ۱۲ زره او ۸۸۴ تنه په بلخ، ۸ زره او ۸۲ تنه په نيمروز، ۴ زره ۹۲۳ تنه په ننګرهار او پاتې نور په بېلابېلو نورو ولایتونو کې له دغو برنامو څخه برخمن شوي دي.
په دغو برنامو کې ګډونوالو ته د شکمن او تورن د حقوقو، د اسلامي شریعت د حکمونو په رڼا کې د ماشومانو د روزنې، پر اولادونو د مور او پلار د حقوقو، نشه يي توکي او د هغو احکام، غصب او د ورته نورو مهمو موضوعاتو په اړه پوهاوی ورکړل شوی دی.
دغه راز په دغو برنامو کې د حقوقي مرستې د څانګې مسلکي غړو په مرکز او ولایتونو کې د ګډونوالو پوښتنو ته ځوابونه ورکړي او د بېلابېلو موضوعاتو په اړه یې هغوی ته حقوقي مشورې وړاندې کړي.
د عدلیې وزارت، د مرکز په ګډون د هېواد په ټولو ولایتونو کې د حقوقي پوهاوي ورکولو برنامې جوړوي او موخه یې دا ده چې خلک د خپلو حقوقو، وجایبو او مکلفیتونو په اړه پوهاوی ترلاسه کړي.
