په بغلان ولایت کې د معاملاتو لارښوونې او موټر پلورنځیو له ۲۶ دفترونو څخه نظارت ترسره شو
د بغلان ولایت د عدليې ریاست مؤظف نظارتي پلاوي د صفر المظفر د مياشتې په ۴مه نېټه د یکشنبې په ورځ د دغه ولایت په مرکز، پلخمري ښار کې د معاملاتو لارښوونې او موټر پلورنځیو له ۲۶ دفترونو څخه نظارت ترسره کړ او د هغو فعالیتونه یې بررسي کړل.
مؤظف نظارتي پلاوي د یادو دفترونو د فعالیت جوازونه، د پېر او پلور قانونيتوب، رسمي سټې، مالیاتي اسناد، په دفترونو کې د معاملاتو لارښوونې د متصدیانو شتون او یو شمېر نور موارد بررسي کړل.
نظارتي پلاوي د دغه نظارت په ترڅ کې د معاملاتو لارښوونې او موټر پلورنځیو د دفترونو یو شمېر کاري نيمګړتياوې او ستونزې هم مشخصې کړې او د یادو ستونزو د اصلاح او د کاري چارو د ښه پرمخ وړلو په موخه یې متصدیانو ته لازمې توصیې وړاندې کړې. د یادو دفترونو متصدیانو هم ژمنه وکړه چې خپلې کاري نیمګړتیاوې به لرې کړي.
د بغلان ولایت د عدلیې رياست په دغه ولایت کې په دوامداره توګه له اړوندو برخو څخه نظارت ترسره کوي تر څو د غیر قانوني فعالیتونو مخه ونیول شي.
