په ارزګان ولایت کې نږدې ۶۵۰ جریبه ځمکه تصفیه شوه
د ارزګان ولایت د ځمکې د غصب د مخنیوي تخنیکي هیئت د ترینکوټ ښار اړوند د خرما په ساحه کې ۶۵۰ جریبه ځمکه تصفیه او تثبیت کړه.
یاده ساحه پخوا د اسلامي امارت لخوا معیوبینو او یتیمانو ته ویشل شوې وه او د هغې د تثبیت بهیر په چټکۍ سره روان دی.
په همدې حال کې د غزني ولایت د تخنیکي هیئت ناسته ددغه هیئت د رییس او غړو به حضور سره جوړه شوه او پکې د مهمو موضوعاتو په اړه بحث وشو.
په دغې ناسته کې کاري پلان هم جوړ شو او هیئت له یو شمېر خلکو سره چې د پولیسو ښارګوټي کې یې دولتي ځمکې غصب کړي هم وکتل.
دغه راز یاد شوي هیئت د خواجه عمري ولسوالۍ د قلعه قربان کلي اړوند د دولتي ځمکو له غاصبینو سره هم وکتل او له هغوی څخه یې سندونه وغوښتل.
