پلچرخي زندان کې د حقوقي پوهاوي ورکوونې د برنامې جوړیدل
![.](/sites/default/files/2023-05/msadyn_hqwqy.jpg)
د عدلیې وزارت د حقوقي مرستو ریاست د ۱۴۴۴ هجري قمري کال د شوال میاشت په ۲۷ نېټه د چهارشنبې په ورځ له حقوقو او مکلفیتونو څخه د هېواد د اوسیدونکو د خبرولو په منظور د پلچرخي زندان، زندانیانو له پاره د حقوقي پوهاوي ورکوونې برنامه جوړه کړه.
په دغې برنامه کې، د حقوقي مرستو رئیس مولوي حافظ عبدالصمد عمري، د زندانونو د عدلي او قضايي چارو د همغږۍ رئیس مولوي عبدالله حقیق، د یاد زندانو پرسونل او د عدلیې وزارت د حقوقي پوهاوي ورکوونې څانګې مبلغانو برخه اخیستې وه او دغه زندان کې توقیف لاندې له ۳۰۰ تنو څخه زیاتو اشخاصو ته د هغوی د حقوقو په اړه پوهاوی ورکړل شو.
په یاده برنامه کې د حقوقي مرستو رئیس د توقیف شویو د حقونو، د حقوقي مرستندوی د تعیین ډول او د توقیف شویو حقونو ته د رسیدګۍ په برخه کې د عدلیې وزارت د پاملرنې په تړاو خبرې وکړې. نوموړي وویل چې د اسلامي امارت دنده ده چې د هیواد د اوسیدونکو حقونو تامین او له هر راز حق تلفۍ څخه یې مخنیوی وکړي.
د حقوقي مرستو رئیس وویل چې بندیان د ټولنې د بې وزلو وګړو برخه ده او مرستې ته اړتیا لري او دغه مرستې باید له هرې ممکنې لارې صورت ومومي. نوموړي زیاته کړه چې د عدلیې وزارت حقوقي مرستو مرستندویان د هغوی په چوپړ کې دي ترڅو د هغو اشخاصو وضعیت، چې برخلیک یې تعیین شوی نه دی او دوسیې یې تعقیب شوي نه دي، ژر تر ژره بررسی کړي او قضایي ادارو ته یې راجع کړي.