نږدې ۷۴ جریبه ځمکه په خوست ولایت کې د غاصبینو له منګولو څخه ازاده شوه
د خوست ولایت د تخنیکي هیئت څخه یو ګروپ د امارتي ځمکو د غصب د مخنیوي په منظور د صبري (یعقوبي) ولسوالۍ ته سفر وکړ او ددغې ولسوالۍ له ولسوال سره یې وکتل.
یاد هیئت ددغې ولسوالۍ په لیو پاله سیمه کې ۷۰ جریبه ځمکه امارتي تثبیت کړه او د غاصبانو څخه یې آزاده کړه. یاد هیئت ددغې ولسوالۍ مسوولینو ته لارښوونه وکړه چې دغه ځمکه د عوایدو د زیاتولو په منظور په اجاره ورکړي. په همدغې ولسوالۍ کې یوه قطعه نوره ځمکه هم امارتي تثبیت شوه او ازادولو له پاره به یې ډیر ژر عملي اقدام ترسره شي.
یاد هیئت د خلبسات سیمه کې هم ۴ جریبه ځمکه چې د سیمې د خلکو لخوا د هدیرې په نوم غصب شوې وه. ازاده کړه.
د هرات ولایت د تخنیکي هیئت ناسته کې، د پل مالان ختیځې او لویدیځي ځمکې، د رباط غوریان چمن او شاوخوا یې د امارتي ملکیتونه او په ابولولید سیمه کې ۵۰۵ جریبه ځمکه د بحث او بررسۍ لاندې ونیول شوه.
په دغې ناسته کې پریکړه وشوه چې تخنیکي هیئت د یادو ځمکو د امارتي سندونو، د متصرفینو سندونه، د کادستر نقشې، او ددغو ځمکو ظاهري حالت له بررسۍ څخه وروسته ددغو ځمکو په اړه تصمیم ونېسي.
د هیئت په واک کې د سندونو او نقشو ورکولو او د ولسوالیو د سیمه ییزو مقاماتو د همکارۍ په اړه هم بحث وشو او موضوع د هرات له والي سره شریکه شوه. د هرات والي هیئت ته په دغې برخه کې د همغږۍ او همکاریو ډاډ ورکړ.
د پکتیکا ولایت د ځمکې د غصب د مخنیوي تخنیکي هیئت هم ددغه ولایت د والي له مرستیال سره وکتل او د عالیقدر امیرالمومنین حفظه الله د فرمان او د تخنیکي هیئت د لاسته راړنو په اړه یې معلومات وړاندې کړل. د پکتیکا د والي مرستیال په دغې برخه کې د همکارۍ ژمنه وکړه.
