ننګرهار ولایت کې ۹۱۸۱ جریبه ځمکه امارتي تثبیت شوه
د ننګرهار ولایت د ځمکې د غصب د مخنیوي کمېسیون تخنیکي هیئت ددغه ولایت سرخرود ولسوالۍ ته سفر وکړ او یوه اندازه امارتي ځمکه يې ددغې ولسوالۍ په ځینو برخو کې تثبت او تشخیص کړه.
یاد هیئت سرخرود ولسوالۍ کې نږدي ۹۱۸۱ جریبه ځمکه فتح آباد او خیر آباد کلیو کې امارتي تثبیت کړې. له یادې ځمکې څخه ۶۴۰۰ جریبه په فتح آباد کلي او پاتې ۲۷۸۱ جریبه ځمکه خیر آباد کلي کې ده. دغې ځمکو کې پخپلسر ښارګوټي جوړ شوي او په غیرقانوني ډول پر خلکو پلورل شوي دي.
د ننګرهار ولایت د تخنیکي هیئت رییس ټینګار وکړ چې غصب شوې ځمکې د غاصبینو له منګولو څخه آزاده او غاصبین به يې عدلي او قضايي ارګانونو ته معرفي شي.
په همدې حال کې، د میدان وردک ولایت د تخنیکي هیئت ناسته د هیئت د رییس او غړو په حضور سره جوړه شوه او د مخکنۍ غونډې د فعالیتونو او د آبدره سیمې په اړه معلومات چې هیئت وړاندې له دغې سیمې څخه لیدنه کړې وه، بحث او د نظر تبادله وشوه.
دغې ناسته کې، پریکړه وشوه چې هیئت د سید آباد ولسوالۍ سیسی دښتې (د معلمینو ښارګوټي) له مدعی بها ځمکې څخه د هغې د تثبیت او تشخیص په منظور لیدنه وکړي.
پر دې سربېره، د دایکندي ولایت د تخنیکي هیئت ناسته د هیئت د رییس او غړو په حضور سره جوړه شوه او په هغې کې د مخکنۍ غونډې مصوبې بیا وکتل شوې او پریکړه وشوه چې د ښوونې اړوند ۴۰ جریبه ځمکې ملکیت دوسیې په اړه له مرکزي کمېسیون څخه لارښوونه غوښتل چې څیړنې يې بشپړې شوي دي. دغه راز پریکړه وشوه چې له محکمو څخه د اشخاصو لخوا وړاندې شوي سندونو د محفوظ ثبت په اړه معلومات وغوښتل شي.
دغې ناسته کې پریکړه وشوه چې د چو، ګرګ کشته او سل بستري روغتون شا ته درېو قطعو ځمکو په اړه لا زیاتې څېړنې ترسره شي د ښاروالۍ د ماسټر پلان سیمه باید په دقیق ډول کوردینات شي ترڅو د سیمې رښتینی مساحت مشخص شي.
دغه راز یاده ناسته کې پریکړه وشوه چې یو قطعه ځمکه چې ددغه ولایت مرکز په ۱ ناحیې د رمکک کلي کې د اشخاصو لخوا تصرف شوې ده، تر بررسۍ لاندې ونیول شي.
