عدليې وزارت کې د حدیث شریف د درسونو د دوه یمې دورې د پرانیستې مراسم جوړیدل
د عدليې وزارت په العدالة مدرسې کې د فنونو د وړې دورې او لویې دورې (حدیث شریف) د درسونو د دوه یمې دورې د پرانیستې مراسم، د ۱۴۴۴ هجري قمري کال د ذوالقعدې د میاشتې په ۱۱ نېټه د چهارشنبې په ورځ، د عدلیې وزارت د سرپرست شیخالحدیث مولوي عبدالحکیم شرعي، د دغه وزارت مسلکي معین، رئیسانو او د دغې دورې د ګډونکوونکو او د عدلیې وزارت د نورو مرکزي مقاماتو په حضور سره، د دغه وزارت په مقر کې جوړ شول.
په دغو دورو کې چې د عدلیې وزارت د دعوت او ارشاد ریاست له خوا ترسره کیږي، شاوخوا ۶۰ تنو برخه اخیستې او د فنونو په وړې دورې او لویه دورې (حدیث شریف) زده کړي ترسره کوي.
د دغې دورې د پرانیستې په مراسمو کې د عدلیې وزارت سرپرست شیخ الحدیث مولوي عبدالحکیم شرعي د عدلیې وزارت د حدیث درسونو دوه یم پړاو پیلیدل د یادې دورې ګډونکوونکو ته مبارکي وویله او هغوی ته یې د اسلام په لار کې د لازیاتو بریالیتوبونو او خدمتونو هیله وکړه.
د عدلیې وزارت مسلکي معین شیخالحدیث مولوي عبدالکریم حیدر هم په دغو مراسمو کې خبرې وکړې او د یادې دورې له ګډونکوونکو څخه یې وغوښتل چې له دغو دورو څخه اعظمي ګټه پورته کړي او د اسلام او د افغانستان باعزته خلکو ته د خدمت په لاره کې ورځني ګټه پورته کړي.
د عدلیې وزارت مقاماتو د یاد وزارت د کارکوونکو د دیني علومو د زده کړي د کچې پورته کولو ته ډیر پاملرنه کړې او په همدې منظور یې سږکال هم په غیر رسمي وختونو کې د فنونو د وړې دورې او لویې دورې تدریس پیل کړی دی. په دغو دورو کې، بخاري شریف او د قرآن کریم تفسیر تدریس کیږي. د یادې دورې لوست د عدلیې وزارت د سرپرست له خوا د بخاري شریف د لومړي حدیث په بیان سره پيل شو.
