د کندز ولایت د ځمکو د غصب د مخنیوي د تخنیکي هیئت د ناستې جوړیدل
د کندز ولایت د ځمکو د غصب د مخنیوي د تخنیکي هیئت ناسته د شوال میاشتې په ۲۵ نېټه د دوشنبې په ورځ د دغه هیئت د سرپرست او غړو په حضور سره جوړه شوه او خان آباد ولسوالۍ کې د یو اندازه ځمکې د استرداد موضوع او یو شمېر نور موضوعات په کې بحث او بررسي شول.
دغه هیئت د کندز د مرکز اړوند د عسقلان ساحې د دوسیې راټول شوي سندونه چې د کندهاریو، ناقلینو او ترکمنو قومونو تر شخړې لاندې ده، بررسي کړل او د یادې ساحې له استازو سره یې هم وکتل.
یاده قضیه په یو وخت کې د کندوز ولایت په ځانګړۍ محکمه کې هم رسیدګۍ لاندې ده او هیئت پریکړه وکړه چې راتلونکو ورځو کې د محکمې له مسوولینو سره کتنه او همغږي صورت ومومي ترڅو د کمېسیون له لارښوونې سره سم موضوع د یوې مرجع لخوا حل شي.
یاد شوی هیئت د خان آباد ولسوالۍ د بوین په کلي کې د ۷ جریبه ځمکې دوسیه د هغې د غیر شرعي متصرف په حضور کې بررسي کړه. د یادې ځمکې متصرف ومنله چې یاده ځمکه د سیند برخه ده او په کرنیزه ځمکه یې تبدیله کړې او اسلامي امارت ته یې د سپارلو له پاره چمتو دی.
یاد متصرف د دغې ځمکې د اجارې نیولو غوښتونکی شو او هیئت یاده ځمکه استرداد کړه او د اجارې ورکوونې په برخه کې یې لازمې لارښوونې صادر کړې.
