د کابل ښار د لسمې ناحيې له ریاست سره د عدلیې وزارت د حقوقي مرستو د ریاست د همغږۍ ناسته جوړیدل
د کابل ښار د لسمې ناحيې له ریاست سره د عدلیې وزارت د حقوقي مرستو د ریاست د همغږۍ ناسته د ذوالحجې میاشتې په ۲۹ نېټه د دوشنبې په ورځ د عدليې وزارت د حقوقي مرستو رئیس مولوي حافظ عبدالصمد عمري، د کابل ښار د لسمې ناحيې رئيس او د نوموړي مرستیالانو او د یادې ناحيې د ګذر وکیلانو په ګډون جوړه شوه.
دغه ناسته د کلام الله مجید د څو آیاتونو په تلاوت سره پیل شوه او د حقوقي مرستو رئیس د حقوقي مرستو او حقوقي پوهاوي ورکوونې برنامې او د ټولنې د ننګونو په حل کولو کې د هغې اهمیت په اړه په کې خبرې وکړې، ویې ویل چې زموږ خلک بې وزله او بې وسې دي او باید له هغوی سره همکاري او مرسته وشي او دغه کار د اسلامي امارت له مکلفیتونو څخه دی.
نوموړي زیاته کړه چې د عدليې وزارت مصمم دی ترڅو د وړیا حقوقي مرستو وړاندې کولو او د حقوقي پوهاوي ورکوونې برنامو جوړولو له لارې، د هیواد په کچه زموږ ګران ولس ته غوره خدمتونه وړاندې کړي او په همدې منظور یې له بېلابېلو ادارو سره غونډې جوړې کړي او د دغو برنامو د تطبیق څرنګوالي او عام ولس ته د ګذر د وکیلانو له لارې د پیغام استولو په اړه بحث او د نظرونو تبادله ترسره کیږي.
په دغې ناسته کې، د کابل ښار د لسمې ناحيې رئیس د دغه ګذر د وکیلانو په استازیتوب د دغه راز برنامو جوړول وستایل او خلکو سره يې تر ټولو ستره معنوي مرسته وګڼله. نوموړي خپل پوښتنې او وړاندیزونه هم مطرح کړل چې د عدليې وزارت د حقوقي مرستو رئیس له لوري واوریدل شول او هغو ته د قناعت وړ ځوابونه وړاندې شول.
