د کابل په ده کیپک ساحه کې عمومي هدیرې لپاره د څه باندې ۵۵۵ جریبه امارتي ځمکې وقف په اړه د عالیقدر امیرالمومنین حفظه الله تعالی فرمان

د افغانستان اسلامي امارت له اساسي موخو څخه یوه د امارتي ځمکو له غصب څخه مخنیوی او د غصب شویو ځمکو استرداد دی چې د ځمکو له غصب د مخنیوي او د غصب شویو ځمکو د استرداد کمېسیون، له لازمو څېړنو وروسته یوه قطعه ځمکه د کابل ښار په اوولسمه ناحیه کې، امارتي تثبیت کړې ده چې په هکله یې لاندې مراتب منظورم:

د  پنځه سوه پنځه پنځوس اعشاریه شپږ سوه او اته ویشت (۵۵.۶۲۸) جریبو په مساحت سره امارتي ځمکه چې د کابل ښار د اوولسمې ناحیې اړوند د ده کيپک په ساحه کې موقعیت لري او حدود یې عبارت دي له: شرقاً د سرای شمالي له څلور لارې او ځینې برخې یې د ده کیپک او بادام باغ له سړک سره متصلې دي، غرباً د خیرخانې د غره له لمنې او د خلکو له خپلسرو آبادیو او د غیر شرعي ذوالیدۍ سره متصله ده، شمالاً ځینې برخې یې د سرای شمالي له هدیرو او ځینې برخې يې د کابل پروان عمومي سړک سره متصلې دي او جنوباً له سلطاني (ده کیپک) عامې غونډۍ سره متصله ده، د عمومي هدیره لپاره دې د ارشاد، حج او اوقافو وزارت ته وقف او ولېږدول شي.

دوه یمه ماده:

(۱) د ارشاد، حج او اوقافو وزارت مکلف دی، د دې فرمان په لومړۍ ماده کې درج شوې ځمکه احاطه کړې او د هېواد اتباع کولای شي، په هغې کې په منظم ډول مړي دفن کړي.

(۲) هیڅوک نه شي کولای، د دې فرمان په لومړۍ ماده کې له درج شوې ځمکې څخه په شخصي موخو یا د خاصې هدیرې په نامه ګټه واخلي.

درېیمه ماده:

دغه فرمان د توشیح له نېټې څخه نافذ او په رسمي جریه کې دې خپور شي.

یاد فرمان د ۱۴۴۵ هجري قمري کال د ربیع الاول د میاشتې په ۱۷ نېټه په ۱۴۳۸ ګڼه رسمي جریده کې د عدلیې وزارت په واسطې چاپ او خپور شوی دی. دغه راز عالیقدر امیرالمومنین حفظه الله تعالی د یادې ځمکې په اړه د کرنې، اوبو لګولو او مالدارۍ وزارت ته دغه ډول لارښوونه کړې ده: یاده شوې ځمکه ژر تر ژره د ارشاد، حج او اوقافو وزارت ته انتقال کړئ او موږ ته اطمینان راکړئ.

په دغه اساس، هېوادوال کولای شي د ارشاد، حج او اوقافو وزارت په همغږۍ خپل مړي په یادې شوې ځمکه کې په منظم ډول دفن کړي.