د کابل ولایت میربچه کوټ ولسوالۍ له مقاماتو سره د عدلیې وزارت د حقوقي مرستو ریاست د همغږۍ ناسته جوړیدل
د عدليې وزارت د حقوقي مرستو ریاست د پلان شوو برنامو پلي کولو او د چارو د لاښه تر سره کولو په منظور، د ذوالحجې میاشتې په ۱ نېټه د دوشنبې په ورځ د کابل ولایت د میربچه کوټ ولسوالۍ له مقاماتو سره د همغږۍ ناسته جوړه کړه.
په دغې ناسته کې د عدلیې وزارت د حقوقي مرستو رئیس مولوي حافظ عبدالصمد عمري، د میربچه کوټ ولسوال، د محکمې قاضي او مفتي، امنیه قوماندان، د استخباراتو مسؤلینو، د دعوت او ارشاد، د ښوونې، د حقوقو، د اراضۍ، د کلیو د چارو او د نورو سیمه ییزو ادارو مسؤلینو حضور درلود.
په دغې ناسته کې، د حقوقي مرستو رئیس، د یاد ریاست پلان او کاري موخې معرفي کړې، ویې ویل چې د ټولنې له اړمنو او بې وزله وګړو سره د حقوقي مرستو وړاندې کول د افغانستان اسلامي امارت د نظام اساسي او مهمه دنده ده.
نوموړي زیاته کړه چې د عدلیې وزارت حقوقي مرستې بې وزله شکمن، تورن، محکوم علیه او مجني علیه له پاره د وړیا مدافع وکیل توظیف کولو او عام ولس له پاره د حقوقي پوهاوی ورکولو د برنامو جوړولو له لارې، وړاندې کوي.
د میربچه کوټ ولسوالې ولسوال، د حقوقي مرستو د ریاست برنامې ډېرې مهمې او اړینې وبللې، ویې ویل چې له خلکو سره د مرستو تر ټولو غوره لار همدغه ده. هغه زیاته کړه چې د یادې برنامې اغیزمنتوب په دې کې دی چې د ټولنې ستونزې په دائمې توګه محدودوي او یا له منځه وړي.
نوموړي ژمنه وکړه چې د حقوقي مرستو ریاست د کاري برنامو پلي کولو له پاره د میربچه کوټ محلي ادارې هر راز همکارۍ ته چمتو دي.
