د کابل ولایت د ده سبز ولسوالۍ له مقاماتو سره د حقوقي مرستو د همغږۍ ناسته جوړیدل
د عدليې وزارت د حقوقي مرستو رئیس مولوي حافظ عبدالصمد عمري او له هغه سره مل پلاوي، د ذوالقعدې میاشتې په ۸ نېټه د یکشنبې په ورځ د کابل ولایت د ده سبز ولسوالۍ له مقاماتو سره د دغه ریاست د حقوقي مرستندویانو او عامه حقوقي پوهاوي کاري ستونزو د هوارولو په منظور د هغمږۍ ناسته جوړه کړه.
په دغې ناسته کې د ده سبز ولسوال مولوي جنت ګل سراج، د محکمې قاضي،امنیه قوماندان، د علماو د شورا رئیس، د دعوت او ارشاد ادارې مسوول، د حج او اوقافو مدیر، د استخباراتو مسوول او د یادې ولسوالۍ نورو سیمه ییزو مسوولینو ګډون کړی وو.
په دغې ناسته کې، د حقوقي مرستو رئیس، د حقوقي مرستو او د عامه حقوقي پوهاوي ورکوونې په برخه کې د عدلیې وزارت کاري برنامو په اړه معلومات ورکړل او د دغې ولسوالۍ له اړوندو ادارو سره یې د حقوقي مرستندویانو موجودې ستونزې له هغوی سره شریکې کړې.
نوموړي د ده سبز د محکمې له قاضي څخه وغوښتل چې له حقوقي مرستدویانو سره همکاري وکړي او له هغوی څخه د دوسیو د پړاونو په تېرولو او د حق او عدالت پلي کیدلو کې کار واخلي.
په دغې ناسته کې، د ده سبز ولسوال د حقوقي مرستو د رئیس او د هغه د مل پلاوي له حضور څخه هرکلی وکړ او ښه راغلاست یې ورته وویل او د حقوقي مرستو له کاري برنامو څخه یې خوښي څرګنده کړه. نوموړي وویل چې د ګڼ شمېر وګړو او په ځانګړي توګه د ادارو د مراجعینو د ستونزو د هوارولو ریښه د هغوي خبرول دي. نوموړي ژمنه وکړه چې د یادې ولسوالۍ په مربوطاتو کې به د یادو شویو برنامو د تطبیق په برخه کې له هیڅ ډول همکارۍ څخه ډډه و نه کړي.
