د ځمکو له غصب څخه د مخنیوي او غصب شویو ځمکو د استرداد کمېسیون اعلامیه

د شریعت له نظره، د امارتي دوایرو ملکیتونه او شتمنۍ ، وقفي املاک، معدنونه، ځنګلونه، څړ ځایونه، غرونه، دښتې، بې څښتنه ځمکې، تاریخي آثار هر هغه څه چې د اتلاف په صورت کې یې، بیت المال ته زیان رسیږي، منقول او غیر منقولې شتمنۍ امارت پورې اړه لري چې له منځه وړل او غصب یې منع، فاعل یې د کبیره ګناه مرتکب شمېرل کېږي او غاصب یا تلف کوونکی یې د خساری په جبران او د شرعي تعزیر مستوجب شمېرل کېږي.
اسلامی شریعت د عامه شتمنیو څخه ساتنه د هر مسلمان مسؤولیت ګڼلی او هر هغه څوک چې عامه شتمني له منځه وړي، غصبوي یې او یا هم زیان ورته رسوي، په سختو ټکو یې غندلی او د دنیوي او اخروي مجازاتو مستحق یې ګنلی دی. 
دا چې غصب ډېر لوی جرم او معصیت دی او ناوړه عواقب لري، د دې په مخنیوی کې موږ د ټول ملت له وګړو څخه د هرراز همکاري غوښتنه کوو.
همدا رنګه غاصبینو ته زموږ پیغام دا دی، پر ځای د دې چې خپل غصب پرېږدي، یو خو یې غصب کړی دی، دوه یم خپل غصب ته دوام ورکوي اودرېیم دا چې غصب ته غصب نه وایي او څلورم دا چې د خپل د دغه لوی جرم او کبیره ګناه د کتمان او پټولو په خاطر، په نظام باندې بې ځایه تورونه پورې کوي، دوی ته باید په واضحو ټکو وویل شي چې دوی نه نظام ته د بښلو وړ دي او نه هم ملت ته، نه یواځې چې غصبي املاک به له دوی څخه راګرځول کېږي، د تمرد او سرغړونې په صورت کې به له دوی سره جدی شرعي چلند ترسره کېږي.