د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته جوړیدل
د ځمکو له غصب څخه د مخنیوي کمېسیون رهبرۍ په یوې ناسته کې چې د عدلیې وزیر او د کمېسیون رئیس محترم شیخ الحدیث مولوي عبدالحکیم شرعي په مشرۍ او د کمېسیون نورو غړو په ګډون ترسره شوه د هېواد په بېلابېلو ولایتونو کې د زرګونو جریبو ځمکو موضوعات وڅېړل او په هکله یې لازم تصامیم ونیول.
په دې ناسته کې چې د روژې د میاشتې په ۲۳ مه نېټه د یکشنبې په ورځ د عدلیې وزارت په مقر کې ترسره شوه، د کرنې، اوبو لګولو او مالدارۍ وزیر محترم مولوي عطاءالله عمري، د کور او ښار جوړلو وزیر محترم مولوي حمدالله نعماني، د سرحدونو، قومونو او قبایلو وزارت معین محترم مولوي محمد اسماعیل غزنوي، د چارو ادارې عمومي رئیس محترم شیخ الحدیث مولوي نورالحق انور، د سترې محکمې استازي محترم شیخ عبدالصمد حقاني، د امارت د قضایاوو عمومي رئیس او د کمېسیون سکرتر محترم احسان الله وثیق او نورو مسؤولینو ګډون درلود.
په دې ناسته کې د ځمکو له غصب څخه د مخنیوي کمېسیون رهبرۍ په غرنیو سیمو کې د ملکیت او ګټې پر بنسټ د ادعاوو او په هلمند، لوګر، جوزجان، میدان وردګ، کندز، کابل او زابل ولایتونو کې د زرګونو جریبو ځمکو موضوعات او یو شمېر نور موضوعات تر بحث او بررسۍ لاندې ونیول.
په دې ناسته کې پرېکړه وشوه چې پر غرونو د ملکیت او ګټې د دعواوو په هکله له اړوندو ادارو سره خبرې وشي او هغو لپاره د حل لارې ولټول شي.
کمېسیون په لوګر ولایت کې د یوي قطعي ځمکې په اړه چې د اسلامي امارت د حاکمیت په لومړۍ دوره کې، تصفیه شوې وه تصمیم ونیو چې د ۱۴۲۰ هجري قمري کال له تصفیې سره سم پرې اجراآت ترسره شي.
په دې ناسته کې د جوزجان ولایت په مرکز کې د سلګونو جریبو ځمکو د موضوع او په زابل ولایت کې د یوې قطعې ځمکې د تصفیې په اړه بحث وشو او د کمېسیون رهبرۍ د هغو په اړه لازم تصامیم ونیول.
دغه راز کمېسیون په هلمند ولایت کې د زرګونو جریبو امارتي ځمکو په اړه تصمیم ونیو چې یاده ځمکې دې د هغې اړوندې ادارې ته وسپارل شي.
