د ځمکو د غصب د مخنیوي او د غصب شویو ځمکو د استرداد کمېسیون د ناستې جوړیدل
د ځمکو د غصب د مخنیوي او د غصب شویو ځمکو د استرداد کمېسیون ناسته د ۱۴۴۴ هجري قمري کال د ذوالحجې د میاشتې په ۱۷ نېټه د چهارشنبې په ورځ د عدليې وزارت سرپرست او د یاد کمېسیون رئیس شیخ الحدیث مولوي عبدالحکیم شرعي په مشرۍ د عدليې وزارت په مقر کې جوړه شوه.
په دغې ناسته کې، د کار او ټولنیزو چارو وزارت سرپرست الحاج ملا عبدالمنان عمري، د کور او ښار جوړلو وزارت سرپرست مولوي حمدالله نعماني، د چارو د ادارې لوی رئیس شیخ نورالحق انور او د امارت د قضایاو لوی رئیس او د یاد کمېسیون سکرتر مولوي احسان الله وثیق او نورو مسؤلینو ګډون درلود.
په دغې ناسته کې، د ځمکو د غصب د مخنیوي کمېسیون رئیس د یاد کمېسیون پر تېرو فعالیتونو رڼا واچوله او د یاد کمېسیون د کاري بهیر پر چټکتیا ټینګار وکړ.
په یاد ناسته کې، د نوي کابل ښار د تصفیې په اړه بحث او خبرې وشوې او دغه راز په جوزجان ولایت کې د پنځو ساحو ځمکو له دغې جملې څخه په فیض آباد ولسوالۍ کې د ۶۰۰ جریبه ځمکې، په مرکز کې د ۲۵۶۰ جریبه نورې ځمکې، د یاد ولایت د مرکز په سه شنبې کلي کې د ۵۰۸ جریبه ځمکې، د فیض آباد ولسوالۍ په کوکلداش کلي کې د ۳۷۴.۹ جریبه ځمکې او د دغه ولایت د مرکز په سنګریک کلي کې د ۴۷۶۷.۶۰ جریبه نورې ځمکې په اړه بحث او د نظرونو تبادله ترسره شوه او دغې برخه کې لازم تصمیمونه ونیول شول.
په همدې توګه یاده ناسته کې، د کابل ولایت په خاکجبار ولسوالۍ کې د ۵۲۷۰.۶۵ جریبه ځمکې، د غور ولایت تېورې ولسوالۍ کې د ۳.۹۹۳ جریبه ځمکې او د ارزګان ولایت په مرکز کې د ۲۱.۸ جریبه ځمکې په اړه هم بحث وشو او دغې برخه کې لازم تصمیمونه ونیول شول. دغه راز ولایتونو ته د کمېسیون د غړو د سفر په اړه بحث وشو او پریکړه وشوه چې د کمېسیون غړي یو شمېر ولایتونو ته سفر وکړي.
