د ځمکو د شخړو د حل کمېسیون درېیمه ناسته ترسره شوه
د ځمکې د شخړو د حل کمېسیون درېیمه غونډه، د ۱۴۰۱ د غوایي په ۲۰ مه د سه شنبې په ورځ د افغانستان اسلامي امارت د عدلیې وزارت سرپرست شیخ الحدیث مولوي صاحب عبدالحکیم شرعي، په ریاست تر سره شوه.
په دې ناسته کې د کمېسیون نورو غړو هر یو د ښارجوړولو او ځمکو وزارت سرپرست حمدالله نعماني، د لوی څارنوالۍ سرپرست مولوي شمس الدین پهلوان، د سترې محکمې د دارالانشأ رئیس مفتي عبدالرشید سعید، د کرنې، اوبو لګولو او مالدارۍ وزارت سرپرست مولوي عبدالرحمن راشد، د کار او ټولنیزو چارو وزارت سرپرست ملا عبدالولي څارنوال او د اسلامي امارت چارو د ادارې د انسجام مرستیال شیخ نورالحق انور ګډون کړی و.
د کمېسیون غړو په دې ناسته کې په هغې طرحې چې د عدلیې وزارت د تقنین ریاست لخوا د ځمکو د غصب د مخنیوي لپاره برابره کړې وه، بحث او نظرونه یې سره تبادله کړل.
په دې ناسته کې، نوموړې طرحه د یو لړ نظرونو او اصلاحي وړاندیزونو په وړاندې کولو سره د تأیید وړ و ګرځیده.
د ځمکې د شخړو د حل کمېسیون د محترم امیرالمؤمنین د لارښوونې پر بنسټ، د عدلیې وزارت د سرپرست شیخ الحدیث مولوي صاحب عبدالحکیم شرعي په ریاست او اړوندو ادارو په غړیتوب را منځته شوی تر څو د دولتې ځمکو له غصب څخه مخنیوی وکړي او د ځمکې د شخړو د حل په برخه کې دې اقدام وکړي.
