د پروان ولایت د عدلیې ریاست د اداري ناستې جوړیدل
د پروان ولایت د عدليې ریاست اداري ناسته د جمادي الثاني میاشت په ۲ نېټه د دوشنبې په ورځ د عدليې رییس مولوي عبدالقدیر عابد په مشرۍ او ددغه ریاست د آمرینو او کارکوونکو په ګډون جوړه شوه.
دغه ناسته د کلام الله مجید د آیاتونو په تلاوت سره پیل شوه او پکې د عدليې رییس د موضوع په اړه خبرې وکړې او ددغه ریاست کارکوونکو ته يې توصیه وکړه چې خپل سیرت او صورت له اسلامي شریعت او نبوي سنتو سره سم عیار کړي او د مراجعینو عریضو او دوسیو ته په ښه ډول رسیده ګي وکړي.
نوموړي ددغه ریاسته کارکوونکو ته لارښوونه وکړه چې د افغانستان زورېدلي او مظلوم ولس ته خدمت وکړي او خپلو کې همغږي ولري.
دغه راز نوموړي ددغه ریاست کارکوونکو ته توصیه وکړه چې د اسلامي امارت ارزښتونو او فرمانونو ته ژمن اوسي او په ټاکل شوي وخت دندې ته حاضر او د رسمیاتو پای ته رسېدو پورې خپلو دندو کې حاضر اوسي.
ددغې ناستې پای کې، د عدليې ریاست آمرینو او کارکوونکو خپل کاري ستونزې له عدلیې رییس شریکې کړې او د عدليې رییس له لوري هغوی ته ډاډ ورکړل شو چې د هغو ستونزو ته به رسیده ګي وکړي.
