د پروان د ځمکو له غصب څخه د مخنیوي تخنیکي هیئت د خپلو څلورو میاشتنیو لاسته راوړنو راپور د یاد ولایت له والي سره شریک کړ
د پروان ولایت د ځمکو له غصب څخه د مخنیوي تخنیکي هیئت د پروان له والي سره د یوې ناستې په ترڅ کې د دغه هیئت د څلورو میاشتنیو فعالیتونو او لاسته راوړنو راپور شریک کړ.
په دې ناسته کې چې د ربیعالثاني د میاشتې په ۲۴ مه نېټه د یکشنبې په ورځ د پروان ولایت د مقام په مقر کې ترسره شوه، تخنیکي هیئت د یاد ولایت په مرکز، چاریکار ښار کې د تېرو څلورو میاشتو په اوږدو کې د پنځهویشت (۲۵) جریبه ځمکې له استرداد څخه خبر ورکړ.
د یاد هیئت د راپور پر بنسټ، په همدې موده کې په چاریکار ښار او سیاګرد، بګرام او جبل السراج ولسوالیو کې څه باندې یو زرو اووهسوه او شپېته (۱۷۶۰) جریبه ځمکې هم بررسي او یا تثبیت او تشخیص شوي دي.
په دې ناسته کې تخنیکي هیئت د پروان له والي سره یو لړ کاري ستونزې هم شریکې کړې. د پروان والي د تخنیکي هیئت لاسته راوړنې وستایلې او ډاډ یې ورکړ چې د ولایت مقام له یاد هیئت سره د هر اړخیزې همکارۍ لپاره چمتو دی.
