د ولایتونو د عدلیې ریاستونو ستونزې و څېړل شوې
د عدلیې وزارت مسلکي معین شیخ عبدالکریم حیدر، د دې وزارت له مرکزي ریاستونو او آمرینو سره په غونډه کې د ولایتونو د عدلیې ریاستونو ستونزې له جملې یې د عدلیې ریاستونو امنیت وڅېړه او د هغه د حل لپاره یې لازمې لارښوونې وکړې.
په دې غونډه کې چې د یکشنبې په ورځ، د وري په ۲۱ مه د عدلیې وزارت د مسلکي معین په مشرۍ جوړه شوه، همداراز د قوانینو د بیا کتنې، د مدافع وکیلانو د ریاست د مهمو اړتیاوو د برابرولو، له جواز اخیستلو مخکې له مدافع وکیلانو څخه د ازموینې د اخیستلو او د تقنین د ستاژ د پیل موضوع و څېړله.
همداراز د غونډې غړیو په خصوصي پوهنتونونو کې د وزارت د کارکوونکو د لوړو زده کړو، د لغو شویو بستونو د کارکوونکو برخلیک، د بالمقطع کارکوونکو د معاش او د هېواد په ولسوالیو کې د عدلیې وزارت د اړوندو ادارو لپاره د ترانسپورت د تدارک په اړه هر اړخیزې خبرې اترې وکړې.
د عدلیې وزارت مسلکي معین شیخ عبدالکریم حیدر لارښوونه وکړه تر څو د قانون جوړونې د چارو د انستیتوت د عمومي رئیس، د مالي او اداري رئیس، د کورنۍ پلټنې د رئیس، د کابل د امارت د قضایاوو رئیس، د داخلي امنیت د مسوول او د اړوندو نورو مسوولینو په غړیتوب یوه کمېټه رامنځته شي او د عدلیې ریاستونو د ستونزو د حل په برخه کې له جملې یې ددغو ریاستونو د امنیت په اړه اقدام وکړي.
