د هلمند ولایت د مقام د نظارت هیئت د عدلیې له ریاست څخه لیدنه وکړه
د هلمند ولایت د مقام له لوري یو ګډ ګمارل شوي پلاوي د صفرالمظفر میاشتې په ۲۲ نېټه د یکشنبې په ورځ د یاد ولایت له عدليې ریاست څخه لیدنه وکړه.
د یاد اصلاحي ګډ هیئت مشرۍ د ولایت مقام استازي محترم مولوي انقلابي پر غاړه درلودله چي د امنیې قوماندانۍ، د استخباراتو ریاست، دعلماؤ شورا، د عدلیې، کرنې، پوهني، محکمو، ښاروالۍ، د امربالمعروف او د اطلاعاتو او کلتور د ریاستونو استازي په کښي شامل ول.
د عدلیې رییس مولوي محمد محمدي په یاده کتنه کې تر هرڅه دمخه د یاد ریاست د تشکیلاتو، لاسته راوړونو او ستونزو په اړه معلومات وړاندي کړل.
ښاغلي محمدي وویل چې زموږ د ریاست ټول کارکوونکي تل هڅه کوي چي د خلکو حقوقي مسایل بررسي کړي او د خلکو حقونه په شرعي طریقې سره ادا کړي.
هغه زیاته کړه چي د عدلیې ریاست د قضایاو آمریت د امارتي املاکو په اړه هڅې کوي تر څو ټول دغه املاک د غاصبینو له منګولو څخه بېرته راوګرځوي.
یاد هیئت د عدلیې ریاست د بېلابېلو له مصرفونو، معاشونو، ربعواره سندونو، حاضرۍ او کاري پلانونو څخه هم لیدنه وکړه.
ګډ هیئت د عدلیې رییس او کارکوونکو ته لارښوونه وکړه چي باید په ټاکلي وخت خپلو دندو ته حاضر شئ او هر کارکوونکی باید خپله دنده د دندو د لایحې پر مطابق په پوره روڼتیا سره ترسره کړي.
د يادوني وړ ده چي دغه هیئت په هلمند ولایت کې له ټولو رياستونو څخه لیدنه کوي او د هغوۍ د ستونزو څخه به ځان خبر کړي.
