د میدان وردګ ولایت له عدلیې ریاست څخه د عدلیې وزارت د پلاوي لیدنه
د ولایتونو د عدلیې ریاستونو څخه د لیدنې او څارنې په لړ کې، د عدلیې وزارت د مالي او اداري رئیس مفتي فضل هادي صاحب زاده په مشرۍ د بېلا بېلو ادارو له رئیسانو او استازو څخه جوړ یوه اته کسیز پلاوي، د ۱۴۰۰ د کب په ۲۱مه د شبنې په ورځ د میدان وردګ ولایت ته سفر وکړ.
دغه پلاوي، په سر کې د دې ولایت د عدلیې ریاست له بېلا بېلو برخو څخه کتنه وکړه او د دې ریاست د کارکوونکو د مسلکي او اداري اجراآتو څرنګوالی و څاره او وڅېړه. یاد پلاوي ددې ریاست د کارکوونکو ستونزې واوریدلی او د هغو د حل په منظور یې لازمې سپارښتنې وکړلې.
همداراز دغه پلاوي د دې ولایت د استیناف محکمې له رئیس او د ښاري محکمې له رئیس سره ناستې جوړې کړې او له هغوی سره د امارت د قضایاوو او د حقوقو د آمریت په برخه کې د عدلیې ریاست ستونزې له هغوی سره شریکې کړې. په دې ناسته کې د عدلیې ریاست او اړوندو ادارو ترمنځ په زیاتی همغږۍ ټینګار وشو.
همداراز یاد پلاوي د میدان وردګ ولایت له والي سره وکتل او د عدلیې ریاست ستونزې یې له هغه سره شریکې کړلې. د میدان وردګ والي ژمنه وکړه چې د عدلیې ریاست ستونزو ته به رسېدنه وکړي.
