د میدان وردګو د عدلیې ریاست او د ځمکو او ښارجوړولو ریاست ترمنځ د همغږۍ ناسته جوړه شوه
د میدان وردګو د عدلیې ریاست او د ځمکو او ښارجوړولو ریاست ترمنځ د همغږۍ ناسته، د ۱۴۰۰ د کب په ۹ د دوشنبې په ورځ د دې ولایت د عدلیې ریاست د غونډو په تالار کې جوړه شوه.
په دې ناسته کې، د میدان وردګو د عدلیې رئیس، د ځمکو او ښارجوړولو رئیس، د امارت د قضایاوو آمر، مسلکي غړیو او د ځمکو او ښارجوړولو د ریاست مدیرانو ګډون درلود.
په دې ناسته کې ګډون والو تر دعوي لاندې د امارتي غصب شویو ځمکو په اړه بحث وکړ او نظرونه یې تبادله کړل او همداراز د ځمکو او ښارجوړولو د ادارې لخوا د رالېږل شویو څلورو جلدو دوسیو په اړه خپل نظریات له عدلیې ریاست سره شریک کړل او په دې برخه کې لا زیاته همغږي رامنځته شوه.
همداراز په دې ناسته کې، د امارتي غصب شویو ځمکو په اړوند د دوسیو د رسیدګۍ او د اسلامي امارت د ځمکو له غصب څخه د مخنیوي په منظور د میدان وردګ ولایت د عدلي او قضايي ارګانونو ترمنځ د همغږۍ د غونډو په جوړېدو ټینګار وکړ.
