د میدان وردک ولایت د ځمکو د غصب د مخنیوي د تخنیکي هیئت ناسته جوړه شوه
د میدان وردک ولایت د ځمکو د غصب د مخنیوي د تخنیکي هیئت ناسته ذوالقعدې میاشت په ۱ نېټه د یکشنبې په ورځ د هیئت د رئیس او غړو په حضور سره جوړه شوه او په کې د ځینو ساحو د بررسۍ په اړه لازم تصمیمونه ونیول شول.
په دغې ناسته کې، تخنیکي هیئت پریکړه وکړه چې د سید آباد ولسوالۍ د ټوپ دښتې په ساحه کې د میدان وردک د لوړو زده کړو د موسسې ملکیت له نږدې بررسي شي او دغه راز پریکړه وشوه چې د هغو ساحو متصرفین چې شمېر یې له ۵۰ تنو څخه لږ وي، د استعلام ورکولو په موخه هیئت ته جلب شي او د هغو ساحو متصرفین چې شمېر یې له ۵۰ تنو څخه زیات وي، هیئت ساحې ته ولاړ شي او هغوی ته استعلام ورکړي.
په دغې ناسته کې، د مرکز په داودخان مېنې ساحه کې د ښاروالۍ پر وړاندې د یو شخص د دعوا دوسیه چې د محکمې لخوا دغه هیئت ته راجع شوې وه، بررسي شوه او پریکړه وشوه چې هیئت په جدي توګه موضوع بررسي کړي. یاد هیئت ۸ ټوکه نورې دوسیې هم بررسي کړې او دغو برخو کې یې لازم تصمیمونه ونیول او دغه راز د یوې قبالې د ثبت محفوظ په برخه کې محکمې ته د استعلام ویشلو په اړه یې هم پریکړه وکړه.
