د معاملاتو په آنلاین سېسټم کې څه باندې ۳۲۰۰ د معاملاتو لارښوونې ثبت شوې دي
د اسلامي امارت د عدلیې وزارت د معاملاتو لارښوونې آنلاین سېسټم په معاملاتو کې د اسانتیا او روڼتیا رامنځته کولو په موخه جوړ او فعاله کړی چې تر دې دمه په کابل ښار کې له ۳۲۰۰ څخه زیات د معاملاتو لارښوونې فعال دفترونه پهکې ثبت شوي دي.
په دې سېسټم کې د املاکو او نقلیه وسایطو ټول معاملات په آنلاین ډول ثبت کېږي، د فعالیت د جواز وضعیت ښودل کېږي او د خلکو عریضې او شکایتونه په چټکۍ سره تعقیب کېږي. همداراز د عریضه لیکونکو د فعالیت او د هغو د جواز د اعتبار څرنګوالی په آنلاین ډول بررسي کېږي.
دغه سېسټم د معاملاتو لارښوونې یا موټر پلورنځي هر ثبت شوي دفتر ته یو ځانګړی بارکوډ په پام کې نیولی چې د هغه له لارې هر فرد یا اداره کولای شي د جواز د اعتبار وضعیت او اړوند معلومات بررسي کړي.
له بلې خوا، د معاملاتو لارښوونې او موټر پلورنځیو سټې هم د دغه سېسټم له لارې د معاملاتو لارښوونې او موټر پلورنځیو د دفترونو متصدیانو ته په آنلاین ډول وېشل کېږي چې په ترڅ کې یې په معاملاتو کې د هر ډول جعل او تزویر مخه نیول کېږي.
اوس مهال د یاد سېسټم معاملات په بشپړ ډول د اجرا وړ دي او له قانوني اعتبار څخه برخمن دي او هر ډول معاملات چې له دې سېسټم څخه بهر او په قلمي ډول ثبت کېږي، قانوني اعتبار نه لري.
