د مشاعرو د تنظیم قانون توشېح او په رسمي جریده کې خپور شو

 د اسلامي امارت د عدلیې وزارت، د مشاعرو د تنظیم قانون د عالیقدر امیرالمؤمنین حفظه الله تعالی لخوا له توشېح څخه وروسته د ۱۴۴۶ هجري قمري کال د ذوالحجة الحرام د میاشتې په ۲۶مه نېټه په ۱۴۶۹ ګڼه رسمي جریده کې خپور کړ.

د مشاعرو د تنظیم په قانون کې چې په رسمي جریده کې خپور شوی تمهید، مقدمه، درې بابونه، دوه فصلونه او ۱۳ مادې شاملې دي چې د مشاعرې د غونډو څرنګوالی، په دغو غونډو کې د شاعرانو د اشعارو محتوا او د مشاعرې د ارزونې هیئت وظایف تنظیموي او د اطلاعات او فرهنګ وزارت یې د تطبیق مرجع ده.

د دغه قانون پر بنسټ شاعران د مشاعرې له غونډې څخه مخکې او د هغې په جریان کې مکلف دي چې اسلامي شعائرو ته له سپکاوي، د قومونو، ژبو او مسلمانانو له تحقیر او تفریق، د غیر اسلامي اخلاقو او ناروا دودونو، د انجونو او هلکانو ستاینه یا له دوی سره دوستۍ ته له دعوتولو او د عالیقدر امیرالمؤمنین حفظه الله تعالی د فرامینو، حکمونو او پرېکړو له نقد کولو څخه په جدي توګه ډډه وکړي او د لمانځه، اذان او د جماعت وخت ته درناوی رعایت کړي.

دغه راز قانون شاعران مکلف کړي چې د خپلو اشعارو په محتوا کې اسلامي اخلاق، شرعي سیاست، د نفس تزکیه، د اسلامي عقیدې تحکیم، د امت وحدت او اسلامي غوښتنو ته بلنه په پام کې ونیسي او شعر یې باید له ناروا خواهشاتو او بې‌ځایه احساساتو څخه خالي اوسي.

په دې قانون کې د اطلاعات او فرهنګ وزارت او اړوند ولایتي ریاستونه یې مکلف دي چې مشاعرې ثبت کړي او د ارزونې هیئت لخوا د مشاعرې له تصفیې څخه وروسته، هغه د یوه ځانګړي آدرس لخوا نشر کړي.

د یاد قانون پر اساس په مرکز او ولایتونو کې د مشاعرې د ارزونې هیئت د اطلاعات او فرهنګ وزارت د باصلاحیته استازي په ګډون د مشر په توګه او د امر بالمعروف، نهی عن المنکر او د شکایتونو اورېدلو وزارت او د علماوو شوری د استازو په غړیتوب رامنځته کېږي. دا هیئت وظیفه لري چې مشاعرې مخکې او وروسته له ترسره کېدو وارزوی او مثبت او منفي ټکي یې په ګوته کړي د منفي ټکو پر حذفولو او د مثبتو ټکو ځای پر ځای کولو اقدام وکړي.

د مشاعرو د تنظیم قانون له مخې، هغه شاعران او ترانه ویونکي چې په خپل شعر او نثر سره یې د ټولنې د اصلاح په برخه کې فعالیت کړي وي، په مناسبه توګه د اطلاعات او فرهنګ وزارت لخوا مکافات کېږي او له دغه قانون څخه سرغړونکي د شریعت له حکمونو سره سم مجازات کېږي.

محترم هېوادوال کولی شي چې د رسمي جریدې دغه ګڼه په چاپ شوې بڼه د عدلیې وزارت د خپرونو او عامه اړیکو له ریاست څخه او په الکترونیکي (پي ډي اف) ډول د عدلیې وزارت د ویب‌پاڼې د حکمونو او قوانینو له ډیټابیس څخه ترلاسه کړي. د یاد قانون د چاپ او خپرولو حق د عدلیې له وزارت سره محفوظ دی او غیرقانوني چاپ یې ممنوع دی.

تلګرام: https://web.telegram.org/k/#@ministryofjusticeafghanistan

دیتابېس:  http://laws.moj.gov.af/ShowLawPashto.aspx