د لوګر ولایت له یو شمېر قومي مشرانو سره د یاد ولایت د ځمکو د غصب د مخنیوي د تخنیکي هیئت کتنه
د لوګر ولایت د ځمکو د غصب د مخنیوي تخنیکي هیئت د ذوالحجې د میاشتې په ۱ نېټه د دوشنبې په ورځ د دغه ولایت د برکي برک ولسوالۍ دادخیل، یوسف کلا او اخندخیل کلیو له یو شمېر قومي مشرانو سره وکتل. یاد مشران په دغو کلیو کې یو اندازه ځمکه خپل ملکیت ګڼي او وایي چې دغه ځمکه باید هغو ته ورکړل شي.
دغه راز تخنیکي هیئت د یادو شوو ساحو قومي مشرانو ته پوښتنپاڼې وویشلې ترڅو هغه ځواب او خپل سندونه دغه هیئت ته وړاندې کړي. یاد شوي هیئت هغوی ته لارښوونه وکړه چې په یادو ساحو کې له نویو کارونو څخه ډډه وکړي.
