د لغمان ولایت د ځمکو د غصب د مخنیوي د تخنیکي هیئت د ناستې جوړیدل
د لغمان ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام میاشتې په ۱ نېټه د سه شنبې په ورځ د یاد هیئت د رئیس او غړو په حضور سره جوړه شوه او دغه هیئت ته استول شوې دوسیې په کې بحث او بررسۍ لاندې ونیول شوې.
په دغې ناسته کې د علینګار ولسوالۍ د نور لام صاحب په دره کې د یو غره او د هغه د لمنې د ۱۴۶.۲۹ جریبه امارتي ځمکې د دوسیې په اړه چې د یادې ساحې څو تنه اوسیدونکي پرې دعوا لري، بحث او خبرې وشوې. هیئت د دعوا د لورو خبرو په اوریدلو سره، پریکړه وکړه چې له هغوی څخه استحضاري واخیستل شي ترڅو د علینګار ولسوالۍ د ابتدائیه محکمې پریکړه تطبیق کړي یا د عدم قناعت په صورت کې د هغوی موضوع اړوندې محکمې ته تحویل کړل شي.
دغه راز په یاده ناسته کې د بادپښ ولسوالۍ د رسول خیل قوم عریضې په اړه بحث او د نظر تبادله ترسره شوه او د دغې ولسوالۍ ولسوال ته لارښوونه وشوه چې هیچا ته د امارتي ځمکو د تصرف او پرې د دوکانونو جوړولو اجازه ور نه کړي.
په همدې توګه دی یو بل شخص دوسیې په اړه چې د دغه ولایت د مرکز په شمتيو کلي کې یو اندازه امارتي ځمکه په اجاره اخیستې او یو شخص د هغه د کار خنډ ګرځي، بحث وشو او تصمیم ونیول شو چې یاد شخص د دغه هیئت راتلونکې ناستې ته وغوښتل شي او له نوموړي څخه استحضاري واخیستل شي ترڅو د امارتي ځمکې د اجاره دار د کار خنډ و نه ګرځي.
