د لغمان ولایت د ځمکو د غصب د مخنیوي د تخنیکي هیئت د ناستې جوړیدل
د لغمان ولایت د ځمکو د غصب د مخنیوي د تخنیکي هیئت ناسته د ذوالحجې د میاشتې په ۱۶ نېټه د سه شنبې په ورځ د دغه هیئت د رئیس او غړو په حضور سره جوړه شوه او په کې د ارزاقو مدیریت اړوند د ګدام سنګي ځمکې په اړه د ارزاقو د مدیر او د هغې ۱۱ بسوې ځمکې متصرف په حضور کې بحث وشو. یاد متصرف ومنله چې د هغه په تصرف کې ځمکه د ارزاقو مدیریت ملکیت دی او نوموړی چمتو دی چې ځمکه اسلامي امارت ته وسپاري او یا هغه په اجاره واخلي. یاد شوي هیئت لارښوونه وکړه چې قرار داد تنظیم شي او متصرف شخص ته ځمکه په اجاره ورکړل شي.
په دغې ناسته کې د ګدام سنګي ساحې اړوند یوه بله دوسیه هم بررسي شوه او پریکړه وشوه دا چې پر ځمکې دعوا شخصي ده، یاده دوسیه استیناف محکمې ته واستول شي.
یاد شوي هیئت د شمټيو ساحې د ۵۰ جریبه ځمکې قراردادي شخص سره وکتل چې ځايي خلک نوموړي ته پر ځمکه د کار اجازه نه ورکوي او د نوموړي ستونزې واورېدې. یاد هیئت امنیه قوماندانۍ ته لارښوونه وکړه ترڅو هغه اشخاص چې د نوموړي د کار مانع ګرځي راتلونکې غونډې ته احضار کړي.
دغه راز یاد هیئت په کرنج ساحه کې د اوبو چینې پر سر د دعوا دوسیې له یو لوري سره وکتل او یادو اشخاصو د خپلې دوسیې په اړه د پریکړې غوښتونکي شول. تخنیکي هیئت د هغوی د دوسیې په اړه معلومات وړاندې کړل، ویې ویل چې د هغوی دوسیه ډېر ژر محکمې ته استول کیږي.
