د لغمان ولایت د ځمکو د غصب د مخنیوي د تخنیکي هیئت د ناستې جوړیدل
د لغمان ولایت د ځمکو د غصب د مخنیوي د تخنیکي هیئت ناسته د شوال میاشت په ۲۴ نېټه د یکشنبې په ورځ د دغه هیئت د رئیس او غړو په حضور سره جوړه شوه.
دغه راز یاد هیئت د قرغه يي ولسوالۍ د کاکڅ ساحې د ځمکې له یو تن اجاره دار سره وکتل او د هغه خبرې يې واوریدلې. نوموړي وویل چې د هغه د اجارې قرارداد د کرنې وزارت لخوا منظور شوی او د سیمې درې تنه اوسیدونکي یې په ساحه کې د کار د پیل مخنیوی کوي. هیئت پریکړه وکړه چې د یادې ساحې اوسیدونکي د هیئت راتلونکې غونډې ته وغوښتل شي.
دغه هیئت له کمېسیون څخه د مسترد شویو دریو دوسیو په اړه هم بحث وکړ او پریکړه یې وکړه چې یادې دوسیې بشپړې شي.
دغه راز تخنیکي هیئت د لغمان ولایت د مرکز اړوند د شمټیو ساحې اړوند د ۵۰ جریبه ځمکې له اجاره دار سره وکتل. نوموړي وویل چې د هغه قرار داد منظور شوی خو ځايي خلک یې د کار د پیل مانع کیږي. هیئت د ساحې له اوسیدونکو سره هم وکتل او هغوی وویل چې یاده ځمکه د هغوی څړځای دی او دولت هم هغوی ته په دغې ځمکې کې ځینې نمرې ویشلي دي. هیئت له بررسۍ څخه وروسته په دغې برخه کې لازم تصمیم ونیو او د دوو اشخاصو د لوړپوړیزې ودانۍ د ځمکې د تخلیې په اړه یې هم بحث او پریکړه وکړه.
