د لغمان او جوزجان ولایتونو د تخنیکي هیئتونو د ناستو جوړیدل
د لغمان او جوزجان ولایتونو د ځمکې غصب د مخنیوي تخنیکي هیئتونو ناستې ددغو هیئتونو د رئیسانو او غړو په حضور سره جوړې شوې او یاد شوي هیئت دغو ولایتونو کې له ځینو ساحو څخه هم لیدنه وکړه.
د لغمان ولایت د تخنیکي هیئت ناسته کې د مخکنۍ اوونۍ د تثبیت شویو ځمکو د دوسیې پر ترتیب او مرکزي کمېسیون ته یې پر استولو ټینګار وشو.
په دغې ناسته کې، د رسمي ښارګوټو د ځمکو د تثبیت په اړه بحث وشو او د یادو شویو ښارګوټو د نقشو پر لیدلو او له هغو سره سم د اجراآتو په اړه پریکړه وشوه.
یاد شوی هیئت له ناستې څخه وروسته د تبۍ کونج کوچي میشتې ساحې ته سفر وکړ او د تره خیل او اکاخیل کوچیانو ترمنځ د شخړې لاندې ساحې څخه له نږدې لیدنه وکړه. هیئت له دواړو قومونو څخه ضروري پوښتنې مطرح کړې چې وروسته به د هغې په اړه پریکړه وشي.
په همدې حال کې، دجوزجان ولایت د تخنیکي هیئت په ناسته کې، د جوزجان اوسیدونکو د یو اندازه ځمکې په اړه د کمېسیون د مشرتابه لیک چې عامه مرعی ځمکې یې تخریب کړي او په اړه یې، د یادو اوسیدونکو او مالدارانو ترمنځ شخړه روانه ده، بررسي شوه.
دغې ناسته د مرنجان، سه شنبه (د ترکستان ښارګوټي)، منګوتي کلیو، د افغان ګاز تصدۍ او د جوزجان ولایت د مرکز اړوند د خواجه دو کو او قوشتپه د عامه مرعی د ځمکو ساحې د بررسۍ له پاره د توظیف شوي ټیم راپور وړاندې او بحث لاندې ونیول شو.
دغه راز په یاده ناسته کې له سیمه ییزو ادارو څخه د رارسیدل شویو جدولونو په اړه د امارت د قضایاو د مسلکي غړو راپور وړاندې شو او بررسي شو. دغه راز د کرنې ریاست ته دنده وسپارل شوه چې د غصب شویو ځمکو کره ارقام راټول کړی ترڅو د هغو له مخې د ۱۴۰۲ کال له پاره کاري پلان جوړ شي.
